LAMATUMBA

Este verán xa vos dixemos que ía ser tranquilo. Realmente foi tranquilo en canto a número de concertos, pero en canto á intensidade deles de tranquilo non tivo nadiña de nada. E temos que decir que bonito. É bonito, en especial cando son poucas veces, reunirse no local a cargar a fregoneta. É bonito percorrer kilómetros cando sabes que vas facer algo que é o que máis che gusta. As probas de son bonitas, o que se di bonitas non son, máis ben un pouco/bastante tostón, aínda que algún hai que ata bota de menos paparse tres horas ao sol escoitándolle ao Carnota o seu característico “siolajéi”, que ese si que se bota de menos (a quén se lle ocurriu chamarlle “ruido rosa” a semellante ruido infernal…). É bonito o agarimo con que nos trata a xente que nos chama para tocar na súa vila (ese pedazo de café de pota que foron facer ás súas casas dúas señoras de Maniños porque a cafeteira do bar estaba apagada; esa xente da organización de Ferreira de Pantón, que conseguen facer un festival cada ano mellor; ese ron de Viveiro que era o mellor no ano… , e efectivamente o era;) ). É bonito o formiguillo que entra no bandullo cando comeza a soar o noso amigo Zorba e vos empezamos a escoitar antes de subir ao palco. É bonito vernos de novo, porque moitas veces nos vemos de novo caras que están aquí, alá, acolá e coas que da gusto compartir unha cervexa antes ou despóis do concerto. É bonito ver a marea de brazos moverse no San Benitiño. É bonito oirvos cantar o Licor Café (licorka non, por favor, un respecto á bebida nacional ;)). É bonito ter o privilexio de poder vivir todo esto. E por riba de todo, o máis bonito é botarnos de menos. Porque nós a vós botámosvos de menos, e é o máis bonito de todo ver que vós, algúns de vós tamén nos botades de menos a nós, e iso non hai master card nin farrapo de gaita que o pague.

Aínda quedan cousiñas que facer neste último tramo de ano, algunha delas ben apetitosa, xa vos imos adiantando. Namentras, seguimos a botarvos de menos, esperamos que vós a nós tamén, aínda que sexa un pouquichiño de nada. Gracias mil por estardes aí.

Seguiremos informando…