LAMATUMBA

Xa alá foi…Onte tocamos en Trabada. Entre os dous pases da orquesta Pas… Qué curioso como dividen estas cousas aos pobos. A un lado os de Vila Orquesta e a outro os de Vila Rock. Tiñades que velo, medio pobo saltando con nós, e outro medio a mirar para o invento a pensar “esta juventú…”. E claro, Zearreta explicando o choio: “Señora, non baila? Veña muller, que o noso é igual, pero cun pouquiño de rocanrol. Pero iso non e pecado. Mmm, bueno, igual si, pero aínda menos mal!”.

            Pero non, o certo é que non é igual. Porque logo, cando a orquesta Pas… voltou ao seu escenario para rematar a faena, nun dos momentos álxidos da verbena de repente toda a orquesta parou de golpe. Todos ao mesmo tempo, na mesma semifusa asincopada. Curioso. Foi moi estrano… Cómo volo poderiamos dicir? O mesmiño o mesmiño como se se lles parase o disco. Non pasa nada, o cantante da orquesta, que era o que manexaba o playback (ops, isto o dixen ou só o pensei?) aínda nos ofreceu unha explicación: “isto xa se sabe, son as cousas que lle pasan a un cando se enchufa nun escenario”. Xa, “enchufado”, picarón… E o Toñito a berrarlles desde abaixo “son as cousas do directo!” Ten razón, señora: non, o noso non é o mesmo.

            E qué pasa con Manolo T…? Hoxe almorzamos en Vegadeo lendo no xornal que o famoso cantante deu onte un concerto en Cee “en estado lamentable” (“La voz de Galicia” dixit). E nós a lle dar coma memos… Para qué carallo vas facer un concerto de dúas horas, tentando que todo vaia no seu sitio, que soe ben, que as cousas funcionen…? Pero home, se o truco estaba en subir ao escenario mamado coma unha prea para voltar baixar tan só coarenta e cinco minutos máis tarde coa carteira un pouco máis chea, pois xa nolo podían ter avisado antes, non?

Menos mal que para o mesmo exemplar de “La voz…” aínda é titular que alguén diga “Para mí es un orgullo poder cantar en mi idioma natal”. E iso que a rapaza é do Incio! Desde logo, aquí non se divirte o que non quere.

Tanto ten. Veña pra diante, que el ritmo no pare, mecagüen…